No souto temos que recoñecer que sentimos debilidade por Paula Carballeira e que calquera cousa que nos conte fai que fiquemos pampos, mirando ao baleiro, pensando, imaxinando grazas ao seu maxín. Por se a arte que ten esta muller non fora pouca faise acompañar moi ben, nada máis e nada menos que de Xosé Tomás, un dos nosos grandes ilustradores. O resultado de xuntar estes dous monstros é A burra Ramona, publicada por Baía Edicións, que ultimamente anda a editar auténticas obras de arte. Quen non mirou as formas das nubes algunha vez?, quen non pensou nas súas cousas ao velas pasar?, quen non soñou con desprenderse de peso e comezar a voar, sucando o ceo na procura da liberdade?A burra Ramona é deses personaxes que convidan a voar, que fan que as cousas pequenas provoquen soños colectivos, abrazando nubes e desouvindo os mandados de exércitos, dos reis tiranos. Trátase da historia dunha burra que un día, farta de levar a vida que levaba, cansa da rutina, decide que quere voar e ponse a mirar para as nubes no medio do camiño, alí, sen moverse, negándose a continuar. Este acto, tan simple, vai arrastrar unha sorte de secundarios que se van deter ata que ela volva querer avanzar. E nese xogo de palabras e de simboloxía, de interpretacións abertas, é fundamental Xosé Tomás que traza unha burra Ramona que transmite simpatía e afectividade e unha realidade ao detalle en distintos azuis, amarelos e castanhos.
Unha obrinha xeitosa, de tapas duras, que agocha miga e fai voar por menos de 10 euriños!
